Heather Mills lögsækir skilnaðarlögfræðing

Heather Mills fyrrverandi eiginkona bítilsins Paul McCartney íhugar nú að fara í mál við lögmann sinn Mishcon de Reya. Mills rak lögmanninn eftir að honum mistókst að komast að samkomulagi við lögmenn bítilsins um eignaskipti.

Erlendir fréttamiðlar greina frá því í dag að Mills muni verja sig sjálf í Hæstarétti þegar hún mætir fyrrverandi manni sínum þar í næstu viku.

Talið er að Mishcon hafi þegar leitað réttar síns vegna ógreiddra reikninga fyrir vinnu sína að upphæð rúmlega 260 milljónum íslenskra króna. Reikningarnir eru allt að eitt og hálft ár aftur í tímann. Mills hefur á móti hótað að lögsækja Mishcon þar sem honum hafi ekki tekist að ná samkomulagi. Lögmaðurinn neitaði að tjá sig um málið við AP fréttastofuna í gær.

Talið er að fyrrverand bítlafrúin vilji ólm ræða samband sitt og McCartney í fjölmiðlum. Hann mun hins vegar vera afar mótfallinn því.

Hjónin fyrrverandi eru langt frá því að vera nálægt samkomulagi. Í næstu viku mætast þau í Hæstarétti í fimm daga fyrirtökum. James Stewart lögmaður lögfræðifyrirtækisins Manches segir átta af hverjum tíu skilnuðum enda með samkomulagi áður en komi að þessu endanlega úrræði í Hæstarétti. Lögmenn og aðrir sem þekki til ráðleggi fólki að forðast þá leið eins og mögulegt sé, því hún sé erfið báðum fjölskyldunum.