Sprengja banaði Bhutto

Breska lögreglan telur að sprengja hafi banað Benazir Bhutto fyrrverandi forsætisráðherra í Pakistan. Hún hafi ekki látist af völdum byssukúlu.

Bandaríska blaðið New York Times segir að með þessu sé breska lögreglan að taka undir skýringar pakistanskra stjórnvalda á orsökum andláts Bhuttos sem lést í Rawalpindi þann 27. desember síðastliðinn. Blaðið segir að niðurstöðurnar muni auka deilur um andlátið en spennan í landinu er þegar mjög mikil. Flokkur Bhuttos hefur hingað til hafnað skýringum stjórnvalda um að kraftur sprengingarinnar hafi banað Bhutto og segja að vitni hafa séð skotsár á höfði hennar.

Skýrsla bresku lögreglunnar lak út en gert var ráð fyrir að hún yrði ekki birt fyrr en síðar í dag. Pakistönsk og bresk stjórnvöld hafa því ekki viljað tjá sig um efni hennar og flokkur Bhuttos segist ætla að bíða með að tjá sig þangað til skýrslan verði kynnt formlega.

The Times sagði einnig að breska lögreglan hefði komist að því að byssumaður, sem sást á fjölmörgum ljósmyndum sem teknar voru á vettvangi, hafi verið valdur að sprengingunni. Times segir þó að ekki sé ljóst hvernig lögreglan hefði komist að niðurstöðu sinni þegar fyrir liggi að vettvangur árásarinnar hafi verið spúlaður fljótlega eftir árásina og að lík Bhuttos hafi ekki verið krufið.