Börn þjálfuð í meðferð skot- og sprengjuvopna

Hernaðaryfirvöld í Bandaríkjunum og Írak hafa birt myndskeið sem sýnir al kaída liða þjálfa börn yngri en ellefu ára í vopnaburði. Bandaríski herinn segir að fimm myndbönd hafi fundist þegar hermenn réðust gegn al kaída liðum í norðurhluta Bagdad í desember. Á myndunum sjást um tuttugu ungir drengir hlaupa um með byssur, og sprengjur. Í einu myndskeiðinu sjást ungir drengir taka þátt í mannráni þar sem þeir ógna manni með byssu. Bandaríski herinn vonast til þess að myndirnar geti fengið almenning í Írak til að snúast gegn íslömskum skæruliðum.