Fyrrverandi kona Ledger miður sín

Fyrrverandi sambýliskona leikarans Heath Ledger segist vera miður sín vegna fráfalls hans og biður um að hún og dóttir þeirra fái að syrgja í friði.

Michelle Williams leikkona skildi við Ledger í september á síðasta ári vegna fíkniefnanotkunar hans. Hún hefur haldið sig frá kastljósi fjölmiðla síðan hún kom í skyndingu til New York í kjölfar dauðsfallsins fyrir hálfum mánuði.

Ledger fannst látinn í íbúð sinni í Soho. Fjölskylda hans bíður niðurstöðu krufningar en talið er að hann hafi látist af ofneyslu lyfja.

Í fyrstu yfirlýsingu Williams frá dauða Ledgers sem hún sendi frá sér fyrir helgina sagði hún; „Ég bið ykkur að virða þörf okkar til að syrgja í friði. Hjarta mitt er brotið." Samkvæmt heimildum People tímaritsins var leikkonan miður sín við fréttirnar og yfirgaf tökustað í Svíþjóð til að fljúga til New York með dóttur þeirra, Matildu.

Williams og Ledger kynntust við tökur myndarinnar Brokeback Mountain þar sem þau léku hjón. Þau bjuggu saman í Brooklyn í New York og eignuðust Matildu í október árið 2005. Þrátt fyrir orðróm um brúðkaup sleit parið samvistum í september.

Í gærkvöldi var haldin minningarathöfn um leikarann í Los Angeles. Hann verður jarðsettur í heimabæ sínum Perth í Ástralíu í vikunni og er búist við að Williams verði viðstödd.