Faðir Spears úrskurðaður lögráðaaðili

James Spears faðir Britney Spears er nú lögráðaaðili yfir dóttur sinni og eigum hennar samkvæmt úrskurði dómstóls í Los Angeles. Söngkonan var flutt á geðdeild UCLA sjúkrahússins á fimmtudag eftir langvarandi óreglu og persónuleg vandamál. Dómstóll getur svipt manneskju lögræði sem ekki getur séð um sig sjálfa eða stjórnað eigin lífi.

Fréttavefur BBC greinir frá því að Britney verði undir forsjá föður síns til mánudagsins 4. febrúar en þá verður önnur fyrirtaka í málinu.

Lögráðaaðilinn hefur völd yfir eigum Spears og getur bannað fólki að heimsækja hana samkvæmt upplýsingum embættismanna. Dómstóllinn í Los Angeles setti einnig nálgunarbann á Sam Lutfi umboðsmann söngkonunnar. Þá var gefið leyfi fyrir því að skipta um lása á glæsivillu hennar og fjarlægja hvern þann sem væri í húsinu.

Þetta er í annað sinn sem Spears er færð á sjúkrahús á innan við einum mánuði. Í janúar var hún lögð inn á Cedar-Sinai sjúkrahúsið eftir að hún neitaði að skila sonum hennar og Kevin Federline á tilsettum tíma.

Í kjölfar þess var forsjá drengjanna færð alfarið yfir til Federline.

Drengirnir Sean Preston og Jayden James eru tveggja og eins árs.