Villi Þ. þyrfti að fara á Dale Carnegie námskeið

Nýr meirihluti mun tæpast lifa árið að mati Hermundar Rósinkranz talnaspekings. Vilhjálmur og Ólafur séu gjörólíkir persónuleikar, sem sigli um á sjóræningjafleyi með rotnin epli innanborðs.

Hermundur segir að tala Ólafs, ásinn, benda til persónuleika sem er frumherji og leiðtogi. Þegar hann ákveður eitthvað stendur hann við það. Hann er ákveðinn og ósveigjanlegur, og fær sínu fram. Vilhjálmur er hinsvegar sjöa. Maður með töluna sjö er góður stjórnandi, en kann illa við sig í sviðsljósi og hentar því betur að stjórna bak við tjöldin.

„Villi þyrfti að fara á Dale Carnegie námskeið og peppa sig upp í ræðumennsku. Það vantar þetta traust í hann," segir Hermundur. Þá þoli sjöan illa gagnrýni, og verði óörugg í sviðsljósinu. Hermundur tekur þó skýrt fram að hann sé þó ekki að tala illa um Vilhjálm. Hann segir að betur hefði farið á því að Vilhjálmur hefði verið borgarstjóri á undan Ólafi. „Ólafur er þreyttur og þarf hvíld, og það hefur ekki með andlega heilsu hans að gera," segir Hermundur. Álagið vegna fjölmiðlafársins í kringum borgarstjórnarskiptin sé einfaldlega mjög þreytandi.

„Það er ekki að sjá að þeir geti náð saman" segir Hermundur. Hann segir að mögulega lifi samstarfið árið, þó hann telji ekki miklar líkur á því. Myndin sem birtist honum af borgarstjórnarsamstarfinu er ekki fögur. „Þetta er eins og sjóræningjaskip. Það er stolið og plottað," segir Hermundur og bætir við að það séu rotin epli innanborðs í samstarfinu.

„Þetta er ekki búið" segir Hermundur. Nú sé plottað á varamannabekknum. Hann spáir því að minnihlutinn í borgarstjórn komi ekki til með að hleypa Vilhjálmi aftur í borgarstjórastólinn. Hann eigi sér þó fleiri óvini en minnihlutann. „Það er eitt og hálft rotið epli í borgarstjórnarflokknum," segir Hermundur. Hann segist ekki vilja nefna hverja hann sér þar, en segir þó að það séu maður og kona. „Hann er rétt að byrja þessi titringur," segir Hermundur.

Hermundur spáði því í viðtali á útvarpi Sögu rétt fyrir áramót að meirihluti tjarnarkvartettsins myndi springa, og hefur því nokkra reynslu af því að spá fyrir um meirihlutaprengingar.