Tölvan dó á versta degi ársins

Breski vísindamaðurinn Cliff Arnall reiknaði það út að mánudagurinn 21. janúar yrði versti dagur ársins 2008. Sjónvarpskonan og rithöfundurinn Sirrý getur skrifað undir það. „Hlutabréf féllu, borgarstjórnin féll og tölvan mín hrundi" segir Sirrý, en þar sem hún sat við skriftir á nýrri bók sinni um Örlagadaga byrjaði tölvan að gefa frá sér torkennileg hljóð, urg og surg. Hún náði að slökkva á tölvunni áður en óhljóðin ágerðust, en þegar kom að því að kveikja á henni aftur vönduðust málin.

Skjárinn var svartur, og tölvan bærði ekki á sér. Sirrý fór með vélina í viðgerð, þar sem hún var úrskurðuð látin. Í tölvunni var fyrsta handritið að bókinni hennar, sem hún var að fara að skila inn til útgefanda, auk handrita að sjónvarpsþáttunum og persónulegra mynda og annarra gagna. Sirrý gat því ekki gefist upp, og fann að lokum mann sem gat gert við tölvuna.

Bókin mun því koma út á fyrirætluðum tíma, í haust.

Hún segir atvikið hafi verið lærdómsríkt. „Þetta er eitthvað sem maður heldur að komi bara fyrir hina", segir Sirrý. Hún ráðleggur fólki eindregið að taka afrit af gögnunum sínum. Margir séu í hennar sporum, og hafi verið lengi á leiðinni að gera þetta. „Þetta er ekki bara vinnan, heldur myndirnar og minningarnar", segir Sirrý, og bætir við að hún hafi farið rakleiðis út í búð og keypt sér minniskubb, og muni héðan í frá taka afrit af öllu.