Prison Break fer ekki í verkfall á Íslandi

Ekki verður gert sýningarhlé á þáttaröðinni Prison Break hér á landi. Allt benti til að gera þyrfti hlé á sýningum þessa vinsælu spennuþátta sökum verkfalls handritshöfunda í Bandaríkjunum, en nú er ljóst að ekki þarf að koma til þess.

Skýringin liggur í því að framleiðendur þáttanna, sjónvarpsstöðin Fox, ákvað með stuttum fyrirvara að klára sýningar á þeim þáttum sem til voru en áður en verkfall hófst lágu fyrir handrit að fimm þáttum. Sýningar á þessum fimm þáttum hófust fyrir um viku síðan í Bandaríkjunum eftir að þeir höfðu verið í hléi síðan í nóvember.

Umræddir fimm þættir fara tafarlaust í sýningar á Stöð 2 og verður fyrsti þeirra sýndur á sunnudaginn kemur.

Þess ber að geta að sjaldan eða aldrei hafa vinsælir bandarískir framhaldsþættir fengist sýndir hérlendis svo skömmu eftir að þeir eru frumsýndir í bandarísku sjónvarpi, en lengi vel þurftu íslenskar sjónvarpsstöðvar að bíða í allt að ár eftir leyfi til að hefja sýningar á þáttum af sambærilegri stærðargráðu.

Aðrir þættir Stöðvar 2 munu halda sínu striki enn sem komið er, utan Grey's Anatomy sem fór í verkfallshlé fyrir réttri viku síðan en hann verður tekinn aftur til sýningar um leið og verkfall leysist. Í þessari viku bárust af því fréttir að framleiðendur og handritshöfundar hefðu loksins fallist á að funda og gera tilraun til þess að ná sáttum, en launadeilan snýst hvað helst um kröfu handritshöfunda um að fá aukinn hlut af sölutekjum af sölu þátta og kvikmynda á netinu og DVD-diskum. Bendir því margt til að verkfallið leysist fyrr en síðar.