Úrvalsdeildarliðin fengu að kenna á því

Enska bikarkeppnin í knattspyrnu er jafnan vettvangur óvæntra úrslita og á því varð engin breyting í dag þegar fjögur lið úr efstu deild fengu skelli gegn minni spámönnum.

Það voru Coventry, Sheffield United, Huddersfield og Oldham sem komu mest á óvart í þeim fjölda leikja sem voru á dagskrá í dag.

Coventry gerði sér lítið fyrir og malaði Blackburn 4-1 á útivelli og var sigur lærisveina Ian Dowie fyllilega verðskuldaður. Blackburn byrjaði vel í leiknum en Michael Mifsud kom gestunum yfir í leiknum. Elliott Ward bætti við öðru marki úr víti og Dele Adebola skoraði þriðja markið. David Bentley minnkaði muninn fyrir Blackburn en það var svo Mifsud sem skoraði fjórða og síðasta mark Coventry og fullkomnaði niðurlægingu Blackburn.

Sheffield United sparkaði Bolton út úr keppninni með 1-0 sigri á útivelli. Bolton var án Nicolas Anelka í dag og var fyrir vikið bitlaust í sóknarleiknum. Það var David Carney sem skoraði sigurmark United í leiknum og tryggði liðinu fyrsta sigurinn í Bolton síðan árið 1977.

Oldham gerði sér lítið fyrir og sló Everton út úr keppninni þar sem glæsilegt mark frá Gary McDonald í upphafi síðari hálfleik tryggði gestunum verðskuldaðan sigur, þrátt fyrir að heimamenn hefðu reyndar farið illa með nokkur góð færi í leiknum.

Þá gerði Huddersfield út um vonir Birmingham í keppninni með 2-1 sigri á heimavelli, en vel má vera að Alex McLeish vilji frekar einbeita sér að því að halda Birmingham uppi í úrvalsdeildinni en náð langt í bikarnum.

Chelsea vann nokkuð auðveldan 1-0 sigur á QPR þar sem markvörður gestanna skoraði sjálfsmark eftir að skot Claudio Pizarro fór í stöngina, í markvörðinn og í netið.

Middlesbrough lenti undir gegn Bristol City en náði að koma til baka og tryggja sér 2-1 sigur á útivelli. Liam Fontaine kom City yfir í leiknum en þeir Stewart Downing og David Wheater tryggðu Boro sigurinn. Boro lenti einnig í bullandi vandræðum með City í keppninni á síðasta ári.

Súrt tap hjá Ipswich

Ipswich þurfti að sætta sig við 1-0 tap fyrir Portsmouth á heimavelli eftir að hafa verið manni færri frá því í fyrri hálfleik. Liam Trotter var þá vikið af leikvelli eftir að hafa fengið beint rautt fyrir tæklingu sem virtist alls ekki alvarleg. Það var svo David Nugent sem tryggði Portsmouth sigurinn með marki skömmu eftir leikhlé, en heimamenn náðu ekki að jafna þrátt fyrir hetjulega baráttu. Hermann Hreiðarsson var á sínum stað í liði Portsmouth í dag, en hann þekkir vel til á þessum velli þar sem hann lék áður með Ipswich.

Sunderland steinlá heima 3-0 fyrir Wigan í slag tveggja úrvalsdeildarliða, þar sem varnarleikur Sunderland varð liðinu að falli í dag. Paul Scharner kom gestunum á bragðið eftir varnarmistök og Paul McShane skoraði svo sjálfsmark. Það var svo David Cotterill sem innsiglaði sigur gestanna með marki á 76. mínútu.

Tottenham náði aðeins jafntefli úti gegn varaliði Reading 2-2. Dimitar Berbatvo skoraði bæði mörk Tottenham en Stephen Hunt bæði mörk Reading, sem bæði geta skrifast að hluta á Paul Robinson í marki Tottenham. Varamaðurinn Tom Huddlestone var rekinn af velli hjá Tottenham fyrir að reyna að skalla Bobby Convey.

Þá skildu West Ham og Manchester City jöfn í bragðdaufum leik og þurfa því að mætast aftur rétt eins og Tottenham og Reading.

Chasetown 1 - 3 Cardiff C.

Walsall 0 - 0 Millwall

Wolves 2 - 1 Cambridge U.

Barnsley 2 - 1 Blackpool

Blackburn R. 1 - 4 Coventry C.

Bolton W. 0 - 1 Sheffield U.

Brighton 1 - 2 Mansfield T.

Bristol C. 1 - 2 Middlesbrough

Charlton 1 - 1 West Bromwich A.

Chelsea 1 - 0 Queens Park R.

Colchester 1 - 3 Peterborough U.

Huddersfield 2 - 1 Birmingham C.

Ipswich T. 0 - 1 Portsmouth

Norwich C. 1 - 1 Bury

Plymouth 3 - 2 Hull C.

Preston 1 - 0 Scunthorpe U.

Southampton 2 - 0 Leicester C.

Southend U. 5 - 2 Dagenham & R'bridge

Sunderland 0 - 3 Wigan Athletic

Swansea C. 1 - 1 Havant and W.

Swindon T. 1 - 1 Barnet

Tottenham H. 2 - 2 Reading

Tranmere R. 2 - 2 Hereford U.

Watford 2 - 0 Crystal Palace

West Ham U. 0 - 0 Manchester C.

Everton 0 - 1 Oldham Athletic

Leikur Aston Villa og Manchester United hófst klukkan 17:15