Katrin Jakobsdóttir eignaðist áramótadreng

,,Ég var búin að kaupa í matinn fyrir gamlárskvöld og undirbúa eitthvað allt annað." sagði Katrín Jakobsdóttir þingmaður hlæjandi, en hún eignaðist dreng snemma á gamlársdag. Litli drengurinn var fjórtán merkur og rúmir fimmtíu sentimetrar, og gekk fæðingin eins og í sögu. Katrín var sett á nýarsdag, en þar sem hún hafði gengið framyfir með eldri son sinn átti hún ekkert frekar von á hinum litla svona snemma. Sá eldri fæddist raunar líka í desember, og hefur parið því nokkra reynslu af því að verja jólum og áramótum í ungbarnaumsjón.

„Þetta gekk bara eins og best verður á kosið og við vorum farin heim fyrir Skaupið" sagði Katrín og bætti við að ótækt væri að missa af því . Hún var ein þeirra sem hreifst ekki af þeirri nýbreytni að bjóða upp á auglýsingu í miðju skaupsins. "Auglýsingin var mesta anticlimaxið. Ég held þeir ættu bara að sleppa þessu." sagði Katrín, sem var mest hissa á því að auglýsingin skyldi ekki vera fyndnari, úr því að hún var höfð ein í miðju Skaupsins.

Katrín tekur sér eðlilega frí frá störfum næstu mánuðina. ,,Jú, ég forgagnsraða þessu efst og fer í fæðingarorlof næstu mánuðina" segir Katrín, en varaþingmaður hleypur í skarð hennar á meðan. Hún segir þó erfitt að sleppa alveg frá vinnunni. „Í pólitík er maður aldrei alveg í fríi. Maður er alltaf að bardúsa eitthvað."