Vill að framtíð Diouf skýrist sem fyrst

Gary Megson, stjóri Bolton, hefur sagt El Hadji Diouf að ganga frá sínum málum sem fyrst. Diouf hefur fengið leyfi til að sinna persónulegum erindagjörðum í Senegal.

Diouf tilkynnti í maí að hann ætlaði að hætta hjá Bolton, sama þó liðið næði að halda sér í úrvalsdeildinni eða ekki. Hann hefur verið orðaður við ýmis lið en framtíð hans er þó í óvissu.

„Allt sem hefur verið sagt um hann hefur komið frá honum sjálfum," sagði Megson í viðtali. Diouf kvaddi stuðningsmenn Bolton í síðasta heimaleiknum á síðasta tímabili en síðan hefur ekkert gerst í hans málum.

„Hann verður að fara að ákveða hvað hann vilji gera og vinna í sínum málum," sagði Megson.