Anna Kournikova iðin við að sitja fáklædd fyrir

Fyrrverandi tennisstjarnan Anna Kournikova lætur sér ekki leiðast heldur vinnur fyrir sér með því að sitja fyrir léttklædd á meðan spænski hjartaknúsarinn Enrique Iglesias gerir upp hug sinn hvort hann vilji hana eða ekki.

Iglesias hefur oftar en ekki sagt tenniskonunni Önnu Kournikovu, að hann muni aldrei giftast henni. Enn fremur hefur söngvarinn engan áhuga á að eignast börn næstu átta árin hið minnsta.

„Fyrir mér hefur eitthvað bréfsnifsi sem staðfestir samband enga þýðingu. Öll sambönd ganga í gegnum sína erfiðu tíma og ég held að hjónaband komi ekki í veg fyrir það. Þvert á móti held ég að hjónaband auki á vandamálin," segir Iglesias sem vill þó ekki útiloka neitt í þessum efnum.

„Ég þarf ekki á giftingu að halda í augnablikinu og ég held að ég sé ekki reiðubúinn fyrir börn. Ég ætla að bíða til fertugs hið minnsta."

Ekki er vitað hvaða áhrif þessi ummæli hafði á samband Iglesias og Kournikovu en pressan beggja vegna Atlantshafsins veltir sér nú alvarlega upp úr því hvort parið er saman eða ekki.