„Guðjón skaðaði ímynd íslenskrar knattspyrnu“

Vísir hefur undir höndum dómsuppkvaðningu Aga- og úrskurðarnefndar KSÍ í máli Guðjóns Þórðarsonar, þjálfara ÍA.

Þar segir meðal annars að Guðjón hafi með framkomu sinni eftir leik Keflavíkur og ÍA skaðað ímynd íslenskrar knattspyrnu.

Guðjón sagði í viðtali við Stöð 2 Sport eftir leikinn að Ólafur Ragnarsson dómari leiksins hefði beitt Stefán Þórðarson ofbeldi með því að sýna honum rauða spjaldið. Einnig að dómarar hafi sérstaklega fundað um hvernig ætti að taka á ÍA og þá sérstaklega Stefán Þórðarson.

Niðurstöðu nefndarinnar má lesa hér að neðan:

„Efni: Framkoma þjálfara ÍA eftir leik Keflavíkur og ÍA í Landsbankadeildinni 25. maí síðastliðinn.

Reykjavík, 5. júní 2008.

Aga- og úrskurðarnefnd KSÍ hefur borist greinargerð frá framkvæmdastjóra KSÍ vegna ummæla Guðjóns Þórðarsonar þjálfara ÍA eftir ofangreindan leik. Erindi framkvæmdastjóra er í samræmi við og uppfyllir þær kröfur sem gerðar eru í 18. grein reglugerðar KSÍ um Aga- og úrskurðarmál. Hlutaðeigandi aðilar hafa fengið afrit af greinargerð framkvæmdastjóra og skilað skriflegri greinargerð í samræmi við reglugerðina.

Það er álit Aga- og úrskurðarnefndar KSÍ að ummæli Guðjóns hafi verið ósæmileg samkvæmt þeirri skilgreiningu sem fram kemur í 18. grein reglugerðar KSÍ um Aga- og úrskurðarmál og með þeim hafi Guðjón gefið í skyn að ekki væri heiðarlega staðið að málum innan KSÍ og unnið væri vísvitandi gegn hagsmunum annars aðilans. Með þessu skaðaði Guðjón ímynd íslenskrar knattspyrnu.

Í samræmi við starfsreglur nefndarinnar ákvað Aga- og úrskurðarnefnd KSÍ á fundi sínum 5. júní 2008 að úrskurða Guðjón Þórðarson í eins leiks bann vegna ummælanna og sekta Knattspyrnudeild ÍA um kr. 20.000.- vegna framkomu hans.

Aga- og úrskurðarnefnd KSÍ vill að lokum minna á nauðsyn þess að grein 1.4 í reglugerð KSÍ um knattspyrnumót verði í heiðri höfð, en þar segir: Félög, iðkendur, forystumenn og aðrir skulu jafnan sýna drengskap og forðast hvaðeina sem rýrt gæti álit almennings á íþróttinni og koma fram af hollustu, heiðarleika og sönnum íþróttaanda. Þeir sem taka þátt í starfi knattspyrnuhreyfingarinnar skulu leitast við að gera ekkert það sem til vanvirðu má telja fyrir íþróttina."