Ólöf Ósk: „Eins og stanslaus jarðskjálftahrina“

„Það var ekki fyrr en mér var bent á það að ég fann að dómurinn var uppreisn æru fyrir mig", segir Ólöf Ósk Erlendsdóttir sem fyrst steig fram í kjölfar Kompásþáttarins um Byrgið og vitnaði um eigin reynslu af kynferðisbrotum Guðmundar forstöðumanns gegn sér.

Þegar dómur féll í Byrgismálinu í Héraðsdómi Suðurlands fyrir rúmri viku þar sem Guðmundur var dæmdur í þriggja ára fangelsi fann Ólöf Ósk til léttis. Í viðtali við Kompás í kvöld segir hún að það hafi þó tekið tímann sinn fyrir sig að átta sig á eigin tilfinningum. „Þetta var búinnn að vera svo mikill rússíbani fyrir mig að ég hafði varla skoðun á því hvort þetta var þungur eða léttur dómur", segir hún. Ólöf er ein fjögurra kvenna sem Guðmundur er dæmdur fyrir að hafa brotið gegn.

Næstu daga eftir að Byrgisþáttur Kompáss var sýndur 17. desember 2006 logaði samfélagið og bar mikið á samúð með forstöðumanninum og gagnrýni á Kompás. Það breyttis þegar Ólöf Ósk steig fram í viðtali í Íslandi í dag fjórum dögum síðar og sagði frá því hvernig Guðmundur hafði, meðal annars með vísan til guðlegrar forsjónar, tælt sig til kynlífsathafna.

Nokkrum mánuðum síðar brast hún undan álagi fjölmiðlaathyglinnar og netbirtingar af kynlífsmyndbandi sem sýndi hana og forstöðumanninn. Við tók margra mánaða neysla fíkniefna og svo fór að hún var ákærð og dæmd fyrir hlutdeild í alvarlegu ofbeldisbroti. Ólöf afplánar nú þann dóm í kvennafangelsinu í Kópavogi.

„Þessi tími er búin að vera eins og stanslaus jarðskjálftahrina", segir Ólöf í viðtalinu en horfir samt björtum augum til framtíðar.

Kompás er á dagskrá Stöðvar 2 í kvöld klukkan 21:50.