Tveir hundar úr Dalsmynni drápust

Það er mjög alvarlegt mál ef hundaræktendur fá leyfi til að selja grunlausu fólki sýkta hunda ár eftir ár. Þetta segir ung kona sem fékk þrjá hunda frá hundaræktendum að Dalsmynni. Tveir þeirra drápust og sá þriðji veiktist alvarlega.

Það var á annan í jólum árið 2006 sem Guðrún Snæbjört Þóroddsdóttir fór með vinum sínum til að skoða hunda. Hún féll strax fyrir fallegri og hraustlegri tík af Chihuahua gerð. Tíkin var kölluð Embla. Hundahaldið gekk vel og því var ákveðið að fá annan hund af Chihuahua gerð í ágúst á síðasta ári. Hann var kallaður Máni. Það leið innan við vika þegar farið var að bera verulega á veikindum Mána og því leitaði Guðrún með hann til dýralæknis. Eftir ítrekaðar læknisvitjanir og mikil veikindi sem stóðu yfir í nærri þrjá mánuði drapst Máni.

Guðrún segir að hundaræktandinn hafi neitað að endurgreiða henni fyrir hundinn sem drapst en henni hafi boðist að fá nýjan hund. Því hafði verið farið í mars síðastliðnum og fenginn fallegur tibet spaniel rakki. Guðrún segist hafa tekið hann þrátt fyrir að ræktandinn hafi varað hana við því að hann væri með lítilsháttar naflaslit. Hún fékk hundinn, sem hún kallaði Otra, um miðjan aprílmánuð. Rétt rúmlega viku eftir að hún fékk hundinn fór hann að líta veiklulega út. Þremur vikum síðar drapst hann. Tveir hundar sem Guðrún hafði fengið frá Dalsmynni höfðu því drepist. Til að bæta gráu ofan á svart er tíkin Embla fárveik vegna smits frá Otra. Embla mun ekki ná sér að fullu fyrr en eftir níu mánuði.

Í samtali við Vísi sagði Guðrún að við krufningu hefði komið í ljós að Otri hefði verið með lifrabólgu og bandorma. Ekki liggi fyrir hvort bandormur af þeirri gerð sem hundurinn var með geti smitast í menn. Guðrún hyggst því leita til heimilislæknis og fá ráðleggingar. Guðrún segist einnig gera ráð fyrir að stefna hundaræktandanum því að fyrir utan það hundarnir og aðstoð dýralækna hafi kostað hundruði þúsunda sé búið að stefna heilsu fjölskyldunnar í hættu. „Það hefur ekki bara áhrif á sálarlíf fjölskyldunnar, heldur eru allir í sýkingarhættu, bæði aðrir heilbrigðir hundar og fjölskyldumeðlimir," segir Guðrún á vefsíðu sinni.

Einlæga frásögn Guðrúnar má lesa á vefsíðu hennar.