Newcastle reið ekki feitum hesti í tíð Keegan

Newcastle er með lélegasta árangur allra liða sem spila í úrvalsdeildinni þegar tekið er mið af stigasöfnun liðsins í stjórnartíð Kevin Keegan sem sagði af sér hjá félaginu í gær.

Keegan tók við Newcastle þann 18. janúar á þessu ári og undir hans stjórn halaði liðið inn aðeins 21 stig frá því hann tók við og þangað til hann sagði af sér í gær.

Þetta er lakasti árangur allra liða sem enn spila í úrvalsdeildinni - þ.e. ef liðin sem féllu úr úrvalsdeildinni í vor eru ekki tekin með.

Bolton hefur líka reyndar aðeins náð í 21 stig á þessu tímabili, en liðið var með skárri markatölu en Newcastle.

Manchester City og Sunderland náðu í 22 stig á þessum tíma og Tottenham, West Ham og Wigan 23 stig.

Þess má til gamans geta að Chelsea hefur náð í flest stig síðan Keegan tók við Newcastle í janúar, eða 45 stig og Liverpool kemur næst með 44 stig. Næst koma meistararnir í Manchester United með 40 stig.