Morðingjarnir halda útgáfutónleika

„Áfram Ísland! er umtalaðasta platan um þessar mundir. Hún hefur fengið glimrandi fína dóma og umsagnir í ýmsum fjölmiðlum, t.a.m. í Mónitor, Stúdentablaðinu, Grapevine og DV. Gagnrýnendur keppast við að lofa Áfram Ísland! og segja hana með flottari rokkplötum í langan tíma og gefa henni hér um bil fullt hús stiga," þetta kemur fram í fréttatilkynningu frá drengjunum.

„Morðingjarnir fylgja þessum fínu viðtökum eftir með tvennum útgáfutónleikum.

Fyrri tónleikarnir fara fram á Græna hattinum á Akureyri kl. 22 föstudagskvöldið 18. apríl. Miðaverð er 500 kall inn og engin helvítis forsala.

Heimamennirnir í Akureyri! sjá um upphitun, en sú hljómsveit var stofnuð eftir epíska tónleika Reykjavíkur! fyrir norðan. Bóas í Reykjavík! sagði við það tilefni að nú þyrfti að stofna hljómsveit með nafninu Akureyri! og nokkrir öflugir norðanpiltar tóku hann á orðinu og kynna sig á Græna hattinum.

Í Reykjavík sér hin stórkostlega Reykjavík! um upphitunina ásamt hinni skemmtilegu og fersku Sudden Weather Change. Seinni útgáfutónleikarnir fara fram í Iðnó kl. 22 föstudagskvöldið 25. apríl. Miðaverð við hurð er 1000 krónur en forsala fer fram á www.midi.is . Í forsölu fást 2 miðar á 1200 krónur."