Neysluútgjöld hækkuðu um 7,7%

Neysluútgjöld á heimili árin 2005-2007 hafa hækkað um 7,7% frá tímabilinu 2004-2006 og voru tæpar 396 þúsund krónur á mánuði, eða 165 þúsund krónur á mann. Á sama tíma hefur meðalstærð heimilis minnkað úr 2,47 einstaklingum í 2,40 og hafa útgjöld á mann því hækkað um 10,7%. Þetta kemur fram í nýrri útgjaldarannsókn sem birt er í nýjustu Hagtíðindum Hagstofunnar.

Rannsóknin tekur til áranna 2005-2007. Rannsóknin sýnir að ráðstöfunartekjur meðalheimilisins í rannsókninni eru um 420 þúsund krónur á mánuði, eða tæpar 175 þúsund krónur á mann. Ráðstöfunartekjur flestra hópa eru hærri en útgjöld þeirra en neysluútgjöldin eru að meðaltali um 94% af ráðstöfunartekjum.

Í úrtaki voru 3.522 heimili og svöruðu um 45% aðspurðra.