Óttast að fjölmargir hafi látist í Albaníu

Óttast er að fjölmargir hafi látist í gífurlegri sprengju sem varð í skotvopnabirgðastöð albanska hersins nálægt höfuðborginni Tirana í dag. Meira en 155 manns slösuðust, þar á meðal mörg börn.

Sali Berisha forsætisráðherra landsins sagðist halda að fjöldi manns hefði látist. „Það lítur út fyrir að fjöldi látinna sé töluverður," sagði hann í viðtali við AP fréttastofuna og bætti við að upplýsingar væru enn ófullnægjandi og hann gæti ekki staðfest fjölda látinna.

Lögregla segir að orsök sprengingarinnar sé ekki ljós, en ekki sé grunur um hryðjuverk. Fyrsta sprengingin hrinti af stað röð sprenginga og skotvopn héldu áfram að springa nokkrum klukkustundum á eftir.