Lögreglan lýsir eftir klósettnauðgara

Lögreglan á höfuðborgarsvæðinu lýsir eftir Robert Dariusz Sobiecki. Hæstiréttur staðfesti 4. desember þriggja ára fangelsisdóm héraðsdóms yfir Roberti sem ákærður var fyrir að nauðga konu inni á kvennasalerni á Hótel Sögu í mars árið 2007.

Robert var í farbanni þar til dómur Hæstaréttar féll en átti þá að hefja aflplánun strax. Hann hefur hinsvegar ekki gefið sig fram og því var gefin út handtökubeiðni á hendur honum

Robert var dæmdur í þriggja ára fangelsi af Héraðsdómi Reykjavíkur í júni en áður hafði Hæstiréttur ógilt fyrri sýknudóm sem féll 2007 og vísað málinu aftur í hérað.

Mál Roberts vakti mikla athygli á sínum tíma. Hann var sýknaður í héraðsdómi í árið 2007 en Hæstiréttur ógilti þann úrskurð og vísaði málinu aftur í hérað. Þar komust nýir dómarar að þeirri niðurstöðu að hann væri sekur og dæmdu hann til þriggja ára fangelsisvistar fyrir að nauðga 19 ára stúlku á salerni á Hótel Sögu.

Þeir sem geta gefið upplýsingar um ferðir Roberts eða dvalarstað eru beðnir að hafa samband við lögregluna í síma 444-1100.