Getur leigt kjólföt fyrir tæpar 10 þúsund krónur

Þeir sem hafa fengið boð um að vera viðstaddir embættistöku Ólafs Ragnars Grímssonar, forseta Íslands, á morgun en eiga ekki kjólföt, hafa kost á því að leigja þau. Kjólföt eru til leigu á flestum betri brúðarkjólaleigum landsins gegn hóflegu gjaldi.

DV greindi frá því í dag að Grétar Mar Jónsson, þingmaður Frjálslynda flokksins, hygðist ekki vera viðstaddur innsetningu forsetans í embætti vegna þess að karlmönnum væri gert að klæðast kjólfötum við athöfnina. „Mér er boðið að vera viðstaddur en ég ætla hins vegar ekki að fara að fjárfesta í kjólfötum sem aðeins verða notuð á fjögurra ára fresti," segir Grétar Mar í DV.

Hjá Brúðarkjólaleigu Katrínar eru fötin leigð á 9900 krónur. Starfsmaður hjá brúðarkjólaleigunni segir þó, í samtali við Vísi, að ekki séu miklar líkur á því að Grétar Mar geti fengið kjólfötin sér að endurgjaldslausu fyrir athöfnina á morgun. „Nei, það held ég ekki. Verður hann ekki að borga eins og aðrir?" spyr Elsa, sem starfar á brúðarkjólaleigunni. Hún bætir því þó við að hún sé einungis starfsmaður í afgreiðslu og ráði því í raun engu um þetta.