McCartney: Stjórn West Ham hafði ekki samráð við Curbishley

George McCartney, fyrrum leikmaður West Ham, segir að stjórn félagsins hafi ekki haft samráð við Alan Curbishley knattspyrnustjóra þegar hann og Anton Ferdinand voru seldir til Sunderland.

Ferdinand var seldur fyrir átta milljónir punda og McCartney sex. Talið er að það hafi valdið því að Curbishley sagði starfi sínu lausu hjá West Ham í gær.

„Curbishley leit svo á að ég og Anton værum ekki á leið frá félaginu," sagði McCartney í samtali við BBC. „En félagið fór á bak við hann og samþykkti tilboðin frá Sunderland."

„Það olli mér miklum vonbrigðum hvað hefur átt sér stað varðandi Alan hjá félaginu. Á þeim tveimur árum sem hann hefur verið við stjórnvölinn tókst honum að bjarga félaginu frá falli og ná tíunda sæti í deildinni á síðasta tímabili. Það var frábær árangur."

„En stjórnin hafði aðrar væntingar. Hún eyddi mikið af peningum og vildu sjálfsagt ná betri árangri."

Stjórn West Ham sendi frá sér yfirlýsingu eftir að McCartney var seldur þess efnis að hann hefði farið fram á sölu frá félaginu.

„Það er rangt. Stjórnin var bara að reyna að hafa stuðningsmennina góða. Þetta eru skrýtnir tímar hjá West Ham og í raun veit enginn hvað á sér stað í fundarherbergi stjórnarinnar."

Íslendingar eru í meirihluta stjórnar West Ham sem er í eigu Björgólfs Guðmundssonar.