Matur er mannsins megin

Matarsjúkdómar og hættur tengdar þeim er einn þeirra málaflokka sem krufnir verða til mergjar á ráðstefnunni Matur, öryggi og heilsa sem Matís og Matvælastofnun standa sameiginlega að á Hótel Hilton Nordica á morgun.

Meðal fyrirlesara á ráðstefnunni verður Franklín Georgsson, sviðsstjóri matvælaöryggissviðs Matís, en hann fjallar um matarsjúkdóma á Íslandi, ýmsar hættur samfara þeim og ber stöðu mála hér saman við ástandið hjá öðrum þjóðum. „Ég mun ræða um helstu öryggishættur í matvælum, bæði í sambandi við örverur og aðskotaefni. Auk þess ætla ég að gefa tölfræðilegt yfirlit yfir matarsjúkdóma hér á landi og hvaða matvæli hafa helst verið tengd þessum matarsjúkdómum," sagði Franklín.

Kamfýlóbakter áður til vandræða

Hann sagði langmestan hluta þeirra sjúkdóma sem hann hygðist ræða í erindi sínu vera sjúkdóma af völdum ýmissa sýkla. „Þarna eru náttúrulega ofarlega á blaði bæði salmonella og kamfýlóbakter. Einnig er núna á síðari árum orðið meira um iðrasýkjandi veirur en langflestir þessara staðfestu matarsjúkdóma eru af völdum örvera. Við vorum í miklum vandræðum með kamfýlóbakter fyrir nokkrum árum. Þá fórum við í markvissar aðgerðir, bættum innra eftirlit, sérstaklega í kjúklingaeldi, auk þess sem við vorum með upplýsingaherferð fyrir neytendur varðandi meðhöndlun matvæla. Einnig var farið út í ákveðnar framleiðsluaðgerðir, t.d. gerð krafa um að sýkt matvara væri fryst þar sem kamfýlóbakterían er viðkvæm fyrir frystingu," sagði Franklín enn fremur.

Nýjar hættur fylgja aukinni fjölbreytni

Í erindi sínu kemur Franklín að auki inn á nýjar hættur sem komnar eru fram vegna aukinnar fjölbreytni í matargerð. Fólk hafi aðgang að mun meira hráefni, meiri verslun sé með viðkvæm matvæli milli landa auk þess sem fólk ferðist nú meira en áður. Hann segir Matís, og þær stofnanir sem urðu að Matís við sameiningu í ársbyrjun 2007, hafa náð mjög góðum árangri með aðgerðum sínum. Ekki hafi fundist salmonella í eldiskjúklingi hér sl. þrjú ár þrátt fyrir að allir eldisflokkar væru prófaðir.

„Það hefur náðst að takmarka mjög mengun þeirra matvæla sem fara út á markaðinn. Þótt sýkt matvæli séu í litlu magni í eldhúsi einhvers staðar getur orðið krossmengun út í alls konar önnur matvæli, t.d. salat og fleira. Sem betur fer eru þessir sýklar viðkvæmir, fullnægjandi eldamennska drepur þá yfirleitt en hættan er á krossmengun yfir í önnur matvæli," sagði Franklín að lokum.