Sex manns fluttir á slysadeild eftir bruna í Tunguseli

Sex manns voru fluttir á slysadeild vegna gruns um reykeitrun í brunanum í Tunguseli í morgun. Slökkvilið lauk störfum um hálfáttaleytið en enn er allt á huldu um eldsupptök.

Sjö voru fluttir á sjúkrahús eftir brunann, þar á meðal maðurinn sem lést. Þrír voru útskrifaðir eftir skoðun en þrennt er í meðferð í svokölluðum háþrýstiklefa vegna reykeitrunar. Að sögn vakthafandi læknis á slysadeild Landspítalans en búist að þremenningarnir nái sér að fullu.

Slökkvilið sendi strætisvagn á vettvang til að taka við því fólki sem býr í stigaganginum þar sem eldurinn logaði. Þá sendir Rauði kross Íslands þrjá sjálfboðaliða á vettvang til að aðstoða íbúana. Að sögn Ingibjargar Eggertsdóttur, verkefnastjóra hjá Rauða krossinum, var alls um að ræða 12 manns í íbúðunum en þeim var veitt áfallahjálp og útvegað föt. „Auk þess kom fólk úr nærliggjandi stigagöngum með kaffi og meðlæti," segir Ingibjörg en íbúarnir fengu að snúa aftur í íbúðir sínar um klukkan átta þegar slökkvistarfi var lokið.

Ljóst er að íbúðin sem brann er illa farin og þá urðu töluverðar reykskemmdir á stigagangi hússins. Lögreglar rannsakar brunann og er rannsókn hennar er á byrjunarstigi og eldsupptök ókunn.