Von á veðurblíðu alla helgina

„Það eru einstaklega góðar veðurhorfur þar sem búast má við björtu veðri um nær allt land megnið af helginni," segir Sigurður Þ. Ragnarsson, veðurfræðingur á Stöð 2.

Hann segir að á morgun verði hlýjast á landinu sunnanverðu og gæti hitinn náð 20 stigum til landsins. Á sunnudag snúist það við og megi þá búast við því að hitinn fari hátt í 20 stig til landsins á Norðaustur og Austurlandi. Sigurður segir að þetta sé með betri helgum sumarsins hvað varði veðurhorfur. Á hinn bóginn sé breytinga að vænta eftir helgi með rigningu sunnantil á landinu.

„Sumarið er mun betra á sunnanverðu landinu heldur en norðantil enda þótt komið hafi góðir dagar nyrðra. Bæði hafa hlýindi verið meiri á landinu sunnanverðu sem og bjartara þegar sólskinsstundir eru skoðaðar," segir Sigurður. Hann segir að þetta minni um margt á sumarið í fyrra, sem hafi verið hægviðrasamt og hlýtt en sólarmeira syðra. Sigurður segir að heldur svalara hafi verið á Norðurlandi í ár en í fyrra. „Þetta er alveg í samræmi við veðurlagsspár snemma í vor en samkvæmt þeim mátti vænta að sumarið yrði hlýtt og nokkuð bjart á sunnanverðu landinu," segir Sigurður.

„Ekki er að sjá neinar grundvallarbreytingar á veðurlagi næstu vikna þó að búast megi við að ein og ein lægðin læðist upp að landinu, eins og vera ber," segir Sigurður að lokum.