Ferguson vonast til að landa einum sterkum leikmanni

Sir Alex Ferguson, stjóri Manchester United, segir félagið hafa gert kauptilboð í leikmann sem muni styrkja liðið til muna. Annars ætlar hann að mestu að byggja lið sitt á sömu mönnum og tryggðu United frábæran árangur á síðustu leiktíð.

"Við erum búnir að bjóða í einn leikmann sem mun styrkja lið okkar til muna. Ég er búinn að fylla skarð Gerard Pique með Johnny Evans, svo við erum með jafnstóran hóp og á síðustu leiktíð. Ef við fáum einn til viðbótar munum við því styrkja okkur enn frekar," sagði Ferguson.

Flestir reikna með því að þessi huldumaður sé búlgarski framherjinn Dimitar Berbatov hjá Tottenham, en sagt er að Lundúnafélagið hafi þegar neitað 20 milljón punda tilboði United í hann fyrr í vikunni. 

Manchester United er nú á leið til Suður Afríku þar sem liðið mun leika á æfingamóti um helgina, en fyrsti leikur liðsins er gegn Kaizer Chiefs í Höfðaborg á laugardaginn klukkan 13:30 og verður hann sýndur beint á Stöð 2 Sport.