Vilja frekar missa Lampard fyrir ekkert

Chelsea er alveg ákveðið í að halda Frank Lampard og vilja frekar missa hann á frjálsri sölu á næsta ári en selja hann til Inter núna. Frá þessu greina enskir fjölmiðlar í dag.

Viðræður við Lampard um nýjan samning hafa engu skilað en samt ætlar Chelsea að neita öllum tilboðum frá Jose Mourinho og félögum í Inter.

„Við viljum halda Frank og höfum sagt það margoft. Við höfum gert honum samningstilboð sem stendur honum enn til boða. Hann á samt ár eftir af samningi sínum og hann mun allavega spila með okkur út þann tíma," sagði Peter Kenyon, framkvæmdastjóri hjá Chelsea.

„Við höfum látið Inter vita af því að ef þeir koma með tilboð í Lampard þá verður því hafnað."