Gísli Marteinn hlakkar til námsvetrar í Edinborg

Gísli Marteinn Baldursson, borgarfulltrúi Sjálfstæðisflokksins, segist hafa fengið mikinn stuðning frá öðrum borgarfulltrúum, bæði í meirihluta og minnihluta, til að láta draum sinn um að komast í meistaranám í Edinborgarháskóla rætast.

Verður á faraldsfæti

Eins og Vísir greindi frá í gærkvöld mun Gísli Marteinn dvelja við nám í Edinborg næsta vetur. Hann mun þó verða með annan fótinn hér á landi allt árið enda á hann, Vala eiginkona hans og dætur þeirra marga aðstandendur hér á landi sem erfitt er að slíta sig frá.

„Fjölskyldan flytur öll út. Vala mun halda áfram með námið sitt í H.Í. frá Edinborg og stelpurnar fara í grunnskóla í borginni. Borgarstjórnarfundir eru tvisvar í mánuði. Ég mun reyna að sækja þá sem flesta, eins og borgarfulltrúar hafa áður gert þegar þeir hafa farið til náms erlendis," segir Gísli Marteinn í samtali við Vísi.

Gott tækifæri

Icelandair flýgur frá Glasgow og er flugtíminn um klukkutími og þrjú korter. „Þannig að þetta er ekki stórmál. Auk þess verð ég virkur þátttakandi í opinberri umræðu á milli þess sem ég læt að mér kveða á borgarstjórnarfundum," segir Gísli jafnframt.

Gísli segir að sér hafi fundist tækifærið vera of gott til að láta það sér úr greipum ganga og hlakki mikið til næsta vetrar. Hann segist þakklátur fyrir þann góða stuðning sem hann hafi fengið frá öðrum borgarfulltrúum til að láta þennan draum verða að veruleika.

Hlakkar til að snúa til baka



„Og eins og ég hlakka til að takast á við verkefni vetrarins, hlakka ég líka til að snúa aftur af fullum krafti í borgarmálin í Reykjavík, vonandi nokkurs vísari, og að klára þau fjölmörgu góðu verkefni sem við erum með í gangi. Það veitir ekki af öllum þeim kröftum sem fáanlegir eru til að lyfta fylginu upp á nýjan leik," segir Gísli Marteinn að lokum.