Rooney nær úrslitaleiknum

Sir Alex Ferguson, stjóri Manchester United, segir að það sé enginn vafi um að Wayne Rooney verði orðinn klár í slaginn þegar liðið mætir Chelsea í úrslitum Meistaradeildar Evrópu.

Ferguson sagði einnig að það væri ekkert hæft í þeim sögusögnum að hann þyrfti á aðgerð að halda vegna meiðsla sinna en Rooney hefur átt við meiðsli í mjöðm að stríða síðan hann meiddist í leik gegn Blackburn í síðasta mánuði.

Hann var ekki í leikmannahópi United gegn West Ham í dag en Ferguson segir að hann sé vissulega tæpur fyrir leik United gegn Wigan í lokaumferð ensku úrvalsdeildarinnar.

Ferguson er þó vongóður um að bæði hann og Nemanja Vidic verði orðnir klárir í slaginn fyrir þann leik.