Ég er kærasta Ivica Kostelic!

Elín Arnarsdóttir byrjaði með króatískum skíðamanni fyrir tveimur árum. Sá heitir Ivica Kostelic og er nokkuð þekktur í heimalandi sínu. Undanfarin tvö ár hafa hinsvegar birst myndir af Margréti Elínu Arnarsdóttur flugfreyju og flugnema í króatískum miðlum. Elínu þykir leiðinlegt að valda hálf nöfnu sinni þessum vandræðum.

„Ég veit ekki hversvegna þetta er til komið en þeir eru búnir að bíta þetta í sig hérna megin," segir Elín og bendir á að myndir af hálf nöfnu sinni hafi birst á nokkrum slúður heimasíðum undanfarið.

Í viðtali við 24 Stundir í morgun segir hálf nafnan Margrét Elín að fyrst hafi þetta verið skondið en nú sé komið gott. Á myspace síðu sinni hefur hún ekki undan við að skoða skilaboð frá króatískum aðdáendum. Þar segir hún einnig að Elín kalli sig Elínu Margréti Arnarsdóttir en engin með því nafni finnst i þjóðskrá.

„Ég heiti bara Elín og hef kynnt mig svoleiðis hérna úti. Ég hef aldrei sagst heita Elín Margrét og veit ekki afhverju ég ætti að bæta því við. Pressan hérna úti hefur bitið í sig allskonar vitleysu og þetta er ein þeirra," segir Elín og hlær.

Hún segir að stóru blöðin sendi yfirleitt sjálf ljósmyndara til þess að taka myndir og því hafi hún sjálf verið á síðum blaðanna.

Kostelic er nokkuð þekktur í heimalandi sínu enda hefur hann náð frábærum árangri á skíðum. „Systir hans er líka rosalega þekkt og þau eru eiginlega brautryðjendur í skíðaíþróttinni hérna," segir Elín og bendir á að „papparassa" menningin í Króatíu sé öðruvísi en heima á Íslandi.

Henni finnst leiðinlegt að valda hálf nöfnu sinni þessum vandræðum enda sé þetta nú ekkert merkilegt. „Við erum bara venjulegt par," segir Elín hneyksluð.

Þau Kostelic eru búin að vera saman í tvö ár og kynntust á skíðum. „Það var nú bara heima á Íslandi þar sem ég hef sjálf verið að æfa skíði. Ég hef alltaf búið heima en er núna hérna úti að læra tungumálið í háskólanum."

Hún segir Kostelic nokkuð þekktan og fólk stoppi þau gjarnan úti á götum til þess að fá eiginhandaráritanir og annað í þeim dúr. „Það er líka bara í lagi en það er leiðinlegra þegar við erum elt af þessum ljósmyndurum, sem hefur verið mikið upp á síðkastið þegar þeir komust að því að ég væri hérna úti," segir Elín en þau búa í Zagreb, höfuðborg Króatíu.

„Þetta er alveg yndisleg borg og hér er gott að vera. En ég ætla að biðja Kostelic að leiðrétta þennan leiðinlega misskilning líka hérna megin. Það er leiðinlegt fyrir hana að vera að lenda í einhverju svona stússi," segir Elín að lokum.