Aron samdi við Coventry til þriggja ára

Aron Einar Gunnarsson, landsliðsmaður í knattspyrnu, hefur samið við enska B-deildarliðið Coventry til næstu þriggja ára. Þetta staðfesti hann í samtali við Vísi.

„Ég fór í læknisskoðun í morgun og það gekk allt saman mjög vel. Ég skrifaði svo undir samninginn og verð orðinn leikmaður Coventry þegar félagið er búið að ganga frá öllum félagaskiptapappírunum við AZ í Hollandi."

„Þetta er allt annað líf hér en í Hollandi og líst mér afar vel á þetta. Völlurinn tekur 30 þúsund manns í sæti og æfingasvæðið lítur mjög vel út."

Aron Einar mun fara beint í aðalleikmannahóp félagsins. „Stefnan er að vinna sér sæti í byrjunarliðinu sem allra fyrst. Annars hefði ég ekki komið hingað."

Knattspyrnustjóri liðsins er Chris Coleman sem þjálfaði áður Heiðar Helguson hjá Fulham. „Hann hafði samband við Heiðar og aðra til að fá upplýsingar um mig og ég held að þetta sé bara allt á mjög jákvæðum nótum."

Félagið átti þó ekki góðu gengi að fagna í vetur og var í mikilli fallhættu. „Þetta félag var farið nánast á hausinn þegar nýr eigandi kom inn og hefur hann verið að breyta miklu hjá því. Framtíðin er því bara björt."