West Ham áfram eftir sigur í framlengingu

West Ham vann í kvöld 4-1 sigur á enska C-deildarliðinu Macclesfield í framlengdum leik á heimavelli í ensku deildarbikarkeppninni.

Sheffield United, Sunderland, Blackburn og Fulham komust einnig áfram í kvöld.

Gareth Evans kom Macclesfield yfir strax á fimmtu mínútu í kvöld en Lee Bowyer jafnaði metin á 74. mínútu.

Í framlengingunni skoruðu þeir Carlton Cole, Zavon Hines og Kyel Reid mörk West Ham.

Sunderland þurfti einnig framleningu í sinni viðureign gegn B-deildarliðinu Nottingham Forest. Robert Earnshow kom Forest yfir en Phil Bardsley jafnaði metin fyrir Sunderland undir lok leiksins. David Healy skoraði svo sigurmark leiksins í framlengingunni en þetta var hans fyrsta mark fyrir félagið.