Roy Keane tæklaður hressilega á æfingum

Craig Gordon, markvörður Sunderland, segir að leikmenn liðsins njóti þess að fá tækifæri til að tækla stjóra sinn Roy Keane þegar hann spilar með á æfingum.

Keane er einn frægasti harðjaxlinn í sögu ensku úrvalsdeildarinnar og segir Gordon að leikmenn Sunderland beri vissulega óttablandna virðingu fyrir stjóra sínum.

Þeir fá hinsvegar tækifæri til að sparka aðeins í hann þegar hann spilar með þeim á æfingum og Gordon segir leikmennina nýta tækifærið til hins ítrasta - því stjórinn fái einfaldlega ekki tækifæri til að svara almennilega fyrir sig.

"Stjórinn lætur sér venjulega nægja að fylgjast með æfingunum en stundum tekur hann þátt þegar við spilum fimm á fimm. Hann tæklar og menn tækla hann til baka - enda gefst þeim ekki oft tækifæri til að tækla stjórann. Hann býst væntanlega ekki við öðru frá leikmönnum sínum. Við sjáum það glögglega að hann er enn frábær leikmaður, en hann tæklar okkur ekki fast - því hann vill auðvitað ekki meiða leikmenn sína," sagði Gordon í samtali við Daily Mail.