Keane og Berbatov vilja fara - Tottenham leggur fram kvörtun

Daniel Levy, stjórnarformaður Tottenham, viðurkennir að bæði Robbie Keane og Dimitar Berbatov hafi farið fram á sölu frá félaginu. Hann hefur lagt inn formlega kvörtun til úrvalsdeildarinnar vegna ummæla knattspyrnustjóra Liverpool og Manchester United.

Robbie Keane hefur undanfarið verið orðaður við Liverpool og hefur Rafa Benitez, stjóri Liverpool, oftar en einu sinni lýst yfir áhuga sínum á leikmanninum í fjölmiðlum.

Sir Alex Ferguson hefur ekki aðeins lýst því yfir að hann vilji kaupa Dimitar Berbatov, heldur sagðist hann í dag fullviss um að landa leikmanninum innan skamms. Bæði Berbatov og Keane eru samningsbundnir Tottenham og stjórnarformaður félagsins á ekki til orð yfir afskiptum stjóranna.

"Ummæli knattspyrnustjóra Manchester United í dag varðandi Dimitar Berbatov bera vott um ótrúlegan hroka og miðast við að grafa undan leikmanninum hjá félaginu. Þetta er líklega eitthvert grófasta reglubrot þessarar tegundar í sögu úrvalsdeildarinnar og hræsnin í orðum hans er ótrúleg í ljósi þess sem hann sagði um Real Madrid og Cristiano Ronaldo," sagði Levy.

Hann segir Tottenham strax hafa gefið út yfirlýsingu til Liverpool og Manchester United þegar spurðist út að félögin hefðu áhuga á framherjunum, en það hafi ekkert haft að segja. Því hafi Tottenham nú ákveðið að klaga þá Benitez og Ferguson til úrvalsdeildarinnar.

"Hegðun beggja félaga hefur verið til háborinnar skammar og þau hafa bæði verið kerfisbundið að moka undan leikmönnum okkar allar götur síðan - þvert á reglur deildarinnar," sagði Levy, en hann viðurkennir að báðir leikmenn hafi farið fram á sölu.

"Svona er staðan hjá okkur í dag. Bæði Keane og Berbatov hafa gert okkur ljóst að þeir vilji fara frá félaginu. Hvað svo sem verður ætlum við að halda áfram að sanka að okkur hæfileikamönnum - mönnum sem vilja spila fyrir Tottenham," sagði Levy.