Flutningabíll slítur vegum á við 12 þúsund fólksbíla

Flutningabíll með tengivagn og áttatíu prósenta hleðslu slítur vegi á við 12 þúsund bifreiðar sem eru 1800 kíló að þyngd. Þetta kemur fram í svari samgönguráðherra við fyrirspurn Árnmanns Kr. Ólafssonar, þingmanns Sjálfstæðisflokksins.

Þar kemur enn fremur fram að ein ferð flutningabíls án tengivangns með 80 prósent hleðslu geti valdið svipuðum niðursbrotsáhrifum á vegum og níu þúsund ferðir 1,8 tonna bíls.

Í svarinu segir einnig að aukið niðurbrot þungra bifreiða á vegum umfram það niðurbrot sem léttari bifreiðar valda byggist á því að við ákveðin þyngdarmörk margfaldist áhrif á burðarlag vegarins. Niðurbrotsáhrif þungra bifreiða á burðarþol vega geti verið breytileg, m.a. eftir styrkleika vegar og búnaði ökutækja. „Þannig verður hlutfallslegt niðurbrot þungrar bifreiðar meira á vegi með veika uppbyggingu heldur en á vegum með sterka uppbyggingu. Fjöðrunarbúnaður, hjólbarðar og gerð ökutækis getur einnig haft mismunandi áhrif á niðurbrot. Það svar sem hér er gefið byggist á einföldu módeli af þeim aðstæðum sem taldar eru dæmigerðar hér á landi," segir í svari ráðherra.

Þá segir í svarinu að ef horft sé til slits nagladekkja á bundnum slitlögum megi ætla að það geti verið um fjórum sinnum meira miðað við hvert dekk flutningabílsins. Það geti þó verið háð ýmsum forsendum, svo sem þyngd nagla, gerð slitlags o.fl.