Fundu 400 grömm af hassi í stærsta fíkniefnamáli Vestfjarða

Lögreglan á Vestfjörðum lagði hald á um 400 grömm af hassi við húsleit í heimahúsi á Ísafirði í gærdag og telur lögregla efnin hafa verið ætluð til sölu.

Húsráðandi, karlmaður á þrítugsaldri, var handtekinn í tengslum við rannsókn málsins en hann hafði skömmu áður verið stöðvaður við almennt umferðareftirlit, grunaður um akstur undir áhrifum fíkniefna. Maðurinn var í haldi lögreglunnar þar til í dag en lögregla segir í tilkynningu að ekki hafi verið talin ástæða til að halda manninum lengur í þágu rannsóknar málsins. Hann hefur áður komið við sögu lögreglu vegna fíkniefnamála.

Um er að ræða mesta magn fíkniefna sem lagt hefur verið hald á í einu lagi á Vestfjörðum til þessa.