Rúmlega 3000 lóðir óseldar

Vel á þriðja þúsund lóðir standa tilbúnar fyrir gröfurnar á höfuðborgarsvæðinu en seljast ekki. Reykvískur læknir leggur til að sveitarfélögin snúi vörn í sókn og leigi lóðirnar út til matjurtaræktunar.

Útlit er fyrir að sex hálfköruð hverfi standi á höfuðborgarsvæðinu næstu árin. Þótt fáir leggi í að byrja að byggja þessa dagana er svartsýnin ekki meiri en svo að þegar fréttastofu bar að garði í Urriðaholti í Garðabæ í gær var þar rafvirki á ferð að tengja ljósastaura. Þó eru hverfandi líkur á að margir munu njóta þeirrar birtu í nánustu framtíð.

Fréttastofa hefur undanfarið kannað stöðu lóðamála á höfuðborgarsvæðinu. Ýmsum hverfum hefur verið slegið á frest um óákveðinn tíma en í Urriðaholtinu eru lóðir undir um 150 íbúðir óseldar.

Á Völlum sjö í Hafnarfirði var lóðum undir 440 íbúðir úthlutað í apríl. Búið er að skila næstum öllum.

Tvö hverfi eru í uppbyggingu í Mosfellsbæ. Leirvogstunga slapp næstum fyrir horn kreppunnar, þar er búið að selja um 300 af 400 lóðum, og flutt er inn í um 50 hús. Umsjónarmaður hverfisins segist hafa fengið erfið símtöl frá fólki í vandræðum sem vill losna við lóðirnar. Sumar hefur tekist að selja. Hann segir húsbyggjendaandann nokkuð breyttan hér handan við góðærið.

Í Kópavogi verður Vatnsendahlíðin vart fullbyggð á næstunni því þar eru lóðir undir um 650 íbúðir óseldar.

Í Reykjavík hefur Úlfarsárdalurinn og Reynisvatnsásinn orðið harðast úti í fjármálafrostinu. Hver einasta lóð sem skilað hefur verið í Reykjavík á þessu ári eru á þessum bletti, lóðir undir rösklega 300 íbúðir.

En þetta svæði gæti verið kjörið land að leigja undir matjurtarækt borgarbúa að mati læknis í borginni sem vill að raskaðar lóðir séu nýttar.

Til að kanna áhugann hvetur Lilja S. Jónsdóttir, læknir og áhugamaður um lýðheilsu. þá sem vilja skika undir kál og hollmeti til að senda sér tölvupóst á bloggsíðu sinni. Hvur veit þá nema ljósastaurarnir geti nýst við uppskeruna í hauströkkrinu.