Halldór móti tillögur um aðstoð til Íslendinga

Samstarfsráðherrar Norðurlandanna hafa ákveðið að fela Halldóri Ásgrímssyni, framkvæmdastjóra Norrænu ráðherranefndarinnar, að móta tillögur um aðgerðir sem eiga að koma Íslendingum til aðstoðar í þeirri fjármálakreppu sem nú stendur yfir. Þetta var ákveðið á fundi ráðherranna sem haldinn var í Kaupmannahöfn í dag.

Á fundinum var lögð áhersla á að sérlega mikilvægt væri að tryggja að meðal annars íslenska fræðasamfélagið og íslensk ungmenni gætu áfram verið virk í norrænu samstarfi. Tillögur Halldórs á, samkvæmt áætlun að leggja fyrir samstarfsráðherrafund í byrjun mars á næsta ári.

„Norrænar þjóðir hafa þegar sýnt stuðning sinn við Íslendinga með aðstoð við að afla lána hjá Alþjóða gjaldeyrissjóðnum," segir í tilkynningu frá Norrænu ráðherranefndinni. „En við teljum þörf á frekari aðgerðum til að styðja við Ísland vegna þess erfiða ástands sem skapast hefur", segja ráðherrarnir.