Ekki pláss fyrir Adebayor og Eto´o hjá Barcelona

Spænska blaðið Marca hefur gert sér mikinn mat úr meintum áhuga Barcelona á framherjanum Emmanuel Adebayor hjá Arsenal að undanförnu.

Marca segir að Arsene Wenger sé ekki tilbúinn að láta Adebayor fara nema félagið finni mann í hans stað, en blaðið fullyrðir að ekkert sé til í þeim fréttum að Barcelona hafi gert 30 milljón evra tilboð í hann eins og haldið var fram í spænskum miðlum á dögunum.

Katalóníublaðið segir hinsvegar að Barcelona muni ekki hafa efni á að kaupa Adebayor nema það losi sig helst við bæði Samuel Eto´o og Ronaldinho til að fjármagna kaupin.