Menntaskólinn við Hamrahlíð friðaður

Þorgerður Katrín Gunnarsdóttir menntamálaráðherra hefur ákveðið friða sjö hús sem öll eru reist á 20. öld að fenginni tillögu húsafriðunarnefndar. Friðunin nær til ytra borðs húsanna.

Um er að ræða Lindargötu 51, eða Franska spítalann, sem var reistur árið 1902 og Dyngjuveg 8 sem einnig nefnist Gunnarshús og var áður heimili Gunnars Gunnarssonar rithöfundar og fjölskyldu hans. Það var reist árið 1950.

Þá er Menntaskólinn við Hamrahlíð, sem byggður var árið 1966, friðaður og sömuleiðis Sjómannaskólinn við Háteigsveg en hann var byggður á árunum 1942-45. Það sem m.a. gerir bygginguna óvenjulega er að innsiglingarrviti Reykjavíkurhafnar er felldur inn í form hússins sem turn.

Þá eru Sólheimar 5 friðaðir en það reisti Gunnar Hansson húsateiknari á árunum 1957-59. Þykir húsið gott dæmi um byggingarlist hans og hefur upphafleg hönnun húsins varðveist að utan sem innan án breytinga.

Enn fremur er Tómasarhagi 31, sem Gísli Halldórsson teiknaði, friðað. Það var reist á árunum 1953-54 og er talið eitt merkasta verk Gísla í listrænu tilliti.

Að lokum er Skriðuklaustur í Fljótsdal, sem Gunnar Gunnarsson skáld lét reisa árið 1939 og teiknað var af þýska arkitektinum Fritz Höger, friðað. „Íbúðarhúsið að Skriðuklaustri er sérstæð með mikið listrænt og menningarsögulegt gildi og var heimili Gunnars Gunnarssonar skálds á árunum 1939-48," segir á vef menntamálaráðuneytisins.