Ástin er val, segir Jógvan Hansen

„Það er fullt að gerast," svarar söngvarinn Jógvan Hansen þegar Vísir spyr hann frétta.

„Ég hef passað mig að halda mig aðeins til baka undanfarið svo Íslendingar fái ekki ógeð á mér og nú get ég byrjað hægt aftur og er tilbúinn með nýtt lag sem fer í spilun á morgun."

„Lagið heitir Celia og er eftir Petur Hans Niclasen sem er vinur minn og nágranni í Færeyjum. Hann samdi líka lagið Rooftop sem var vinsælt síðasta sumar á Íslandi. Textahöfundurinn, Hulda Birna Eiriksdóttir, er læknir sem býr í Danmörku. Ég fæ mixið í kvöld og sendi það í spilun á morgun."

„Lagið er létt stuðlag sem fjallar um mann sem hittir stelpu og það er pínu love at first sight. Ég er að færa mig frá þessu rólega yfir í meira stuð."

Trúir þú á ást við fyrstu sýn?

„Á ég að segja þér hvernig ég horfi á ástina? Ástin er val eða ákvörðun sem þú tekur um að elska aðra manneskju. Ég trúi ekki að það er einhver ein manneskja í heiminum sem er rétt fyrir þig. Ástin felst í því að þú hittir rétta manneskju á réttum tíma og velur að elska hana."