Erfitt að velja milli United og Real

Væntanlega er enginn leikmaður í heiminum betur til þess búinn að meta stöðu Cristiano Ronaldo en David Beckham. Hann segist skilja að Portúgalinn standi frammi fyrir gríðarlega erfiðri ákvörðun.

Beckham var sjálfur aðalstjarna Manchester United á sínum tíma en hann skipti frá United yfir til Real með látum árið 2003.

"Þegar ég fór frá United var Real eina félagið sem mig langaði að spila fyrir. Það eru ekki mörg félög eða borgir sem fá mann til að vilja fara frá Manchester - en þar kom aðeins Madrid til greina. Það er gott fyrir Ronaldo að hafa þessa tvo valkosti. Mig dreymdi um að spila fyrir United og Real á sínum tíma og ég er viss um að það sama er uppi á teningnum hjá Cristiano," var haft eftir Beckham í Daily Mail í dag.