Einmitt á tíma samdráttar og krepputals eiga menn að láta drauminn rætast um endurbætta Sundhöll Reykjavíkur með útilaug og auðga þannig mannlífið í borginni. Þetta er skoðun arkitektsins sem teiknað hefur viðbygginguna.
Þegar hún var opnuð fyrir rúmum sjötíu árum þótti Sundhöllin eitt veglegasta mannvirki Reykjavíkur. En þrátt fyrir útipotta á svölunum þykir hún ekki svara kröfum nútímans. Fyrir sjö árum fólu Miðborgarsamtökin undir forystu Bolla í Sautján arkitektinum Ívari Erni Guðmundssyni að rissa upp hugmyndir að viðbyggingu með útilaug og hann setti fram þessa lausn sem hefur síðan verið að velkjast í kerfinu.
Rykið var dustað af hugmyndinni í sumar og í síðustu viku ákvað skipulagsráð borgarinnar að taka lóðina frá. En nú er skollin á kreppa og draumur um endurbætta sundlaugarparadís í miðborginni virðist víðsfjarri.
Það er viðkvæmt mál að breyta þessu hugverki Guðjóns Samúelssonar húsameistara því laugin, búningsklefarnir og meira að segja sturturnar í gömlu Sundhöllinni eru friðlýstar.
