Umhverfisráðherra vill ekki kosningabaráttu á aðventunni

Þórunn Sveinbjarnardóttir umhverfisráðherra segir það ekki skynsamlega tillögu hjá stjórnarandstöðunni að ætla að nýta aðventuna í kosningabaráttu, eins og vantrauststillaga á ríkisstjórnina gengur út á. Þetta kom fram í umræðum á Alþingi í dag.

Þá sagði Þórunn jafnframt að stjórnarandstaðan væri of sundurlynd, bæði innan flokka og milli flokka, til þess að geta komið að stjórn landsins. Hún sagði að þingmenn stjórnarandstöðunnar ættu það eitt sameiginlegt að vera karlmenn, framsóknarmenn væru á kafi í miðjum innbyrðisátökum og Vinstri grænir væru einangrunarsinnar sem ættu enga samleið með öðrum.

Þórunn og Björgvin G. Sigurðarson hafa þó bæði sagt opinberlega að þau vilji að kosningar fari fram á næsta ári.