Þórunn: Nóg komið af gamaldags lausnum

Þórunn Sveinbjarnardóttir, umhverfisráðherra, segir að fólk sé búið að fá nóg af gamalds lausnum í virkjanamálum. ,,Ég held að fólk sé búið að fá nóg af gömlu lausnunum og meðvitaðra að orkan sem við eigum er mjög verðmæt og hún muni einungis vaxa í verði. Það er hægt að nýta orkuna í margt annað en að knýja áfram gamaldags stóriðju."

Meirihluti þjóðarinnar telur nóg komið af virkjunum samkvæmt skoðanakönnun sem Fréttablaðið birti í dag. 57 prósent styðja ekki frekari virkjanir fyrir orkufrekan iðnað.

Þórunn segir niðurstöðuna vera gleðilega og vísbendingu um breytt hugarfar í samfélaginu. Aftur á móti segir hún að varast þurfi að fullyrða of mikið á grunni einnar skoðanakönnunar.

Þórunn segir ein mestu tíðindin vera hversu lítill munur er á afstöðu fólks eftir búsetu. 59 prósent svarenda á landsbyggðinni eru mótfallanir frekari virkjun og eru þeir fleiri en á höfuðborgarsvæðinu.

,,Það hefur jafnvel verið þannig að fólk á höfuðborgarsvæðinu hefur verið að segja öðrum hvað landsbyggðinni er fyrir bestu. En af sjálfsögðu veit fólk á landsbyggðinni best hvað það vill og þessi könnun virðist sýna að fólk telur nóg vera komið af virkjunum," segir Þórunn.