Clinton hjónin raka saman milljörðum

Bill og Hillary Clinton hafa gert það býsna gott síðan þau fluttu úr Hvíta húsinu fyrir átta árum.

Samanlagðar tekjur þeirra á þessu tímabili hafa verið rúmir átta milljarðar króna, eða um einn milljarður króna á ári.

Til samanburðar má geta þess að síðasta árið í Hvíta húsinu voru samanlagðar tekjur þeirra um 26 milljónir króna.

Tæplega helmingur tekna þeirra síðan hefur komið frá fyrirlestrum sem Bill hefur haldið víðsvegar um heiminn. Meðal annars á Íslandi.

Helstu leiðtogar Vesturlanda eru láglaunafólk miðað við það sem gengur og gerist í atvinnulífinu í löndum þeirra.

Þeir geta hinsvegar bætt sér það upp eftir að þeir láta af embætti. Þeir geta þá rakað saman milljörðum króna á ári með fyrirlestraferðum og ráðgjöf.

Sú er til dæmis raunin með Tony Blair, sem veit nú ekki aura sinna tal.