Uggur meðal starfsmanna Icelandair

Uggur er meðal starfsmanna Icelandair en félagið hefur boðað fjöldauppsagnir um næstu mánaðamót. Starfsmenn félagsins funda á morgun.

Icelandair hefur ákveðið að grípa til fjöldauppsagna um næstu mánaðarmót. Hefur félagið nú þegar sent tilkynningu þessa efnis til starfsmannafélaga.

Formaður félags íslenskra atvinnuflugmanna staðfesti í samtali við fréttastofu í morgun að slík tilkynning hefði borist en vildi ekki tjá sig frekar um málið að svo stöddu.

Í Fréttablaðinu í dag kemur fram að um 300 starfsmenn Icelandair Group, móðurfélags Icelandair, verði sagt upp. Er um að ræða flugmenn, flugfreyjur og starfsfólk í fyrirtækjum sem þjónusta flugvélar Icelandair á Keflavíkurflugvelli. Á síðastnefnda staðnum verður 80-100 manns sagt upp samkvæmt tilkynningu til Vinnumálastofnunar.

Sigrún Jónsdóttir, Formaður Flugfreyjufélags Íslands, sagði í samtali við fréttastofu Stöðvar 2 að það væri mikill uggur í fólki. Hún sagði ennfremur að þær tölur sem fram hefðu komið í fjölmiðlum varðandi fjölda flugfreyja sem sagt verði upp störfum væru of háar. Hún vildi hins vegar ekki gefa upp um hversu stóran hóp væri að ræða og sagðist fyrst vilja tala við sína félagsmenn um málið.

Boðað hefur verið til starfsmannafundar hjá Icelandair á morgun. Samkvæmt heimildum fréttastofu hyggst félagið einnig gera breytingar á áætlunarflugi og fella suma áfangastaði niður til að hagræða í rekstri.

Ekki hefur náðst í upplýsingafulltrúa Icelandair vegna málsins.

Tíðindin virðast þó hafa haft jákvæð áhrif á gengi Icelandair Group í Kauphöllinni en félagið hefur hækkað mest allra fyrirtækja í morgun eða um nærri þrjú prósent.