Jo keyptur fyrir metfé

Manchester City hefur gengið endanlega frá kaupunum á brasilíska sóknarmanninum Jo frá CSKA Moskvu. Kaupverðið er ekki gefið upp en það mun vera hæsta upphæð sem City hefur greitt fyrir leikmann.

Enskir fjölmiðlar telja kauðverðið vera um 18 milljónir punda. Jo er 21. árs og er hann fyrstu kaup Mark Hughes. Hann skoraði 44 mörk í 77 leikjum fyrir Moskvuliðið eftir að hafa komið frá Corinthians árið 2005.

„Þegar ég komst að því að möguleiki væri að krækja í Jo þá varð ég staðráðinn í að láta það verða að veruleika. Hann er frábær leikmaður og virkilega spennandi," sagði Hughes.

Fleiri félög höfðu áhuga á Jo en hann valdi City þar sem félagið virtist hafa mestan áhuga á að fá hann.