Banna vestræna eftirlitsaðila

Stjórnvöld í Zimbabwe hafa bannað eftirlitsaðilum frá vestrænum ríkjum að fylgjast með forsetakosningunum sem fara fram í landinu seinna í mánuðinum. Simbarashe Mumbengegwei utanríkisráðherra sagði að Afríkuríkjum yrði heimilað að senda eftirlitsmenn, eins og bandamönnum þeirra í Kína, Íran og Venesúela.

Robert Mugabe forseti heldur því fram að Vesturlönd reyni að koma honum frá völdum.

Tveir bjóða sig fram gegn Mugabe í kosningunum 29. mars. Simba Makoni, fyrrverandi fjármálaráðherra, og Morgan Tsvangirai stjórnarandstöðuleiðtogi. Mugabe hefur kallað mótframbjóðendur sína „nornir" og „svikahrappa".

Mugabe hefur setið á forsetastóli frá því landið fékk sjálfstæði frá Bretum árið 1980. Hann vonast til að í kosningunum tryggi hann sér sjötta kjörtímabilið.