Eins árs fangelsi fyrir hrottafengna árás og nauðgun

Héraðsdómur Suðurlands hefur dæmt karlmann í eins árs fangelsi, þar af níu mánuði skilorðsbundna, fyrir hrottafengna árás og nauðgun gagnvart unnustu sinni. Þá var hann dæmdur til að greiða henni rúmar sex hundruð þúsund krónur í miskabætur.

Maðurinn var ákærður fyrir frelsissviptingu, líkamsárás og nauðgun í málinu. Samkvæmt ákæru fór hann inn í íbúð á Laugarvatni þar sem unnusta hans var og togaði hana út og inn í bifreið sína. Þaðan ók hann að Gjábakkavegi og dró hana út úr bílnum og sló hana í andlit og líkama. Þá setti hann hana aftur upp í bíl og ók að húsi á Laugarvatni þar sem hann dró hana á hárinu út úr bílnum og inn í íbúð þar sem hann braut gegn kynfrelsi hennar. Þá sló hann hana ítrekað í andlitið og líkama og hlaut konan ýmsa áverka við þessar aðfarir mannsins.

Maðurinn játaði að hafa veist að konunni en neitaði að hafa dregið hana á hárinu út úr bílnum eins og í ákæru greinir. Þá neitaði hann einnig að hafa slegið hana ítrekað í líkama og andlit. Dómurinn komst hins vegar að því út frá gögnum málsins að maðurinn hefði orðið sekur um það.

Maðurinn bar því við að hann hefði haldið að konan hefði verið honum ótrú en dómurinn segir að það komi honum ekki til refsilækkunar. Hins vegar var litið til þess að maðurinn játaði brot sín að mestu en einnig að árásin var hrottafengin og ófyrirleitin og að hluta framin inni á heimili konunnar þar sem fjórtán ára dóttir hennar var einnig stödd og varð vitni að fólskulegri árás á móður sína.

„Þá verður að líta til þess að um brotasamsteypu er að ræða og að ofbeldi ákærða stóð yfir í umtalsverðan tíma og var til þess fallið að niðurlægja unnustu hans og svipta hana mannlegri reisn," segir dómurinn enn fremur.